,
مَساحةْ حُزنٍ تفيض ُ من عيني ْ
(1)
كَانتْ الأوضاعْ طَبيعيّهْ ..
(2)
كان صباح يوم الأربعاء يعج ُ
بالأخبار التيْ لا بأس بها ..!
قالت: اخوك من السفر راجع !!
أعتصرتني عبرة ..
أجهل اسبابها !!
أهي فرحتي بفرحها الذي لم أراه في عينيها منذ زمن !!
أو هو الفراق ؟!
(3)
كنت انظر اليها وفي عيني ألف سؤال !
و بابتسامة صفراء .. رفعت الهاتف ..
( ألو .. السلام عليكم
أنا والدة الطالبة ( . ............ )
حبيت اسأل عن نتيجة بنتي ..
أبوها مسافر وانا تعبانة مقدر اجي اخذهاا )
كانت رغم اتعابها شايله همنا !!!
(4)
غلبني النعاس .. هذي عادتي عندما اشعر بالخوف !!
لأعلم
لماذا كُنت أهربـ ُ خلفـ النعاس , أركض أبحث
عن ثمة شيءٍ يجلب لي القليل منهاْ..!!
كُنت أشعر بإنتشال شيءٍ من صميم ذاتيْ
هل كُنت أحتضر معهاْ
هل كانت روحي بين يديهاْ..!
..!
كُنت أدعي [ ياااااااااااربـ تخليها لي ولا تحرمني منها ]
أعلم بأنانيتي ولكنْ لم أكُن، اتصور مداها..!!
( 5 )
صحيت على صوت اختي يرتجف:
( قومي ماما تعبت فجاءة ونقلوها المستشفى)
ركضت من سريري الى الباب بلا شعور
كنت أعلم انها النهاية !!
نبهني اخي الصغير ..
( آجواء العباة !! ... )
ركضت في الطرقات وفي بالي ألف فكرة
( أبوي مسافر لعزاء عمه ..
واخوي مابعد وصل
.
.
وش اسوي واحنا بنات بروحنا ..!! )
( 6 )
دخلت المستشفى لوحدي ..
كان بالقرب من منزلنا الذي اصبح مهجوراً الأن !
ضاعت نظرتي بين الغرف
( بأي غرفة قلبي نايم !! )
دلني جارنا .. الذي رافقهم للمستشفى
وبيده التي ترتجف ..
( هناك يابنتي )
( 7 )
دخلت والخوف يكاد يقتلني !
ومن بين افكاري جاء صوت اختي ..
انها بـــ خير..!
( 8 )
كيف تكون بخير وكل هذه الاجهزه تحيطها
من أعلى رأسها حتى أخمص قدميها..!!
كُنت أعلم أنكِ بحالٍ لا يسُـــر ..!
كُنت واثقه أن ثمة ضررٍ يقع عليك..ّ
كُنت أسهر وأنا اتلمس وجعٍ في جسدي ولكن لم أكُن أعلم
أنك أنت من كان يتألم ْ
سمعتها تنادي اختي بصوتٍ ضعيف
] .. .. يا ( ... ) اخوانك .. وصاتك اخوانك [
سقطتـ ُ على صدرها أبكي وأصرخ هل هذه بخير..!!
[ كيف كُــنتوا تضحكون عليّ ]
وهل من في مثل حالها يسمى بــ خير
( تكفيين يمه لا توصين ..
مافيك شي !!
ألحين باخذك ونرجع للبيت ..
تكفين يمه لا تخوفيني تكفين..
اخوي جاي ..
وابوي اليوم بيجي ..!
لا توصين ...
تكفين يمه .. تكفين )
يااااااااااااااحبيبتي
ياااااااااااقلبـــــــــــي ..!
يادنيتـــــــــــي ..
يارحيلي ..
ياقهريـ ..!!
كم ماتت مشاعري وانا أراكِ بهــ كذا حال..!
كم تبلدتـ أوجاعي .. وكم تساااااااااقطتـ سنيني وأنا اكحل ناظري بأقسى منظر رأيتك فيه..!
وبعد قليل
.
,,
.
( 9 )
كل شي حولي توقف
إلا انفاس الخوف اللي تتتصاعد الى اذني
وصوت صفير الجهاز المتواصل !!
كانـ الخَبر يعبر أذني ولا يَعبُر ..!
أسمعه ولا أجيب ..!
كانت الصرخات من حولي توقضني من سباتي ..!
تصفعني ..!
أنتي هنا في وااقعك ..!!
من كُانتْ ظلكْ قد ... رحلت ..!!
بــ تاريخ 29 / 11 / 1424 هـ
[ ماتتـ أمي ..! ]..!
"
"
"
يا يمه وينك من دونك خلا البيت
يوم رحلت
ناديتها .. وعندي امل انها ترد
راحت ولا ردت خبر
وبأخر انفاس الوداع
تعلق اسمي بصوتها
كنه يقدم لي عذر
لغيابها
لسكوتها !!
وينك ؟!
دنيا من بعدك ضياع
دنيا من دونك ألم !
تعالي شوفي الذكريات
مافارقتني بغيبتك
كم عذبتني !
ليتها ليلة هجرتني
مليت انا من صوتها
تردى حالي واتعبتني
يمه الالم .. عيا يمل !
على حسابي .. وصحتي !
..................................
محد كثري يحس بقيمة فراقك
محد مثلي .. يبكي ان حن واشتاقك !
اجاملهم ..
ويظنوني قوية باس !
وانا في داخلي نار تكويني على عناقك
فقدتك .. وانا لليوم احسك في شراييني
فقدتك ..
مدري وش فيني !!
احس الكون كله ضايق بعيني ..
من فراقك !
تبدلت يمه بعد عينك احوال !
................ وضاقت عروقي بالحزن والنحايب
يمه غيابك طال والموت لو طال !
................... دمعي لمحته في عيون القرايب !
وشلون اصدق إن (من فوقك رمال )
................. و انا اشوفك في وجيه الحبايب !!
ماعاد فيني حيل اشغلتي البال !
................ وهدتني ايام الشقا والمصايب !!
......................
فقدتك
قليل لوقلت : اني فقدتك !
فقدتك
وفي اول ليلة من بعدك
دمعتي مافارقتني
عجزت اتحمل صدمة الموت
كل ماغمضت عيني لمحتك
صوتك .. ملامح ضحكتك
كل شي في بيتنا
عطرك ..
وحتى غرفتك تبكي عليك
من بقالي بعد مارحتي !!
فرحتي صارت بخيلة من رحلتي
حتى نوم الليل عفته
مدري عافني !!
.
.
تدرين يمه ..
كل من شافني
وصاني على اخواني
(انتي اكبرهم ..
لا يشوفون حزنك !!
لايحسون فيك
انسي معاناتك ثواني )
وهذا يمه اللي ذبحني
حاولت اداري عبرتي عنهم
وصارت دمعتي سكين
اذا اخفيتها تجرح
واذا بينتها تدرين ..
انا اكبرهم ..
كيف ابين حزني لهم !!!!!!!
:
/
ياخالي وين اروح وجروح قلبي كبار ؟!!
......... ابكي ويبكي البيت واضيق بركانه !
صوت الفراق المر اربك زوايا الدار
......... وهزت صداه اوجاع قفله وبيبانه !
راحت وانا لليوم ابكي مع التذكار
......... واشوف (طيف امي )في بيض جدرانه
راحت وخلت لي غرشة عطر واسوار
......... ماتدري ضمتها تسوى مية دانه !!
ذكرى تموت بيوم وذكرى تعيش اعمار
......... و يا خالي ذكراها خلتني عطشانه !
كنها بقايا حلم في خافقي وانهار !
......... ما امداه شاف النور وانهد بنيانه !
خالي الألم وياي كنه يبي له ثار !
......... وكني قتلت بيوم واحد من اخوانه !
ليت القدر يرجع واقول له يختار
......... روحي فدا لعيون ( اعز انسانه ) !!
/
/
/
ليت الزمن وقف قبل ماترحلين !
الله يرحمك يمه
تعليق