أخي محمد

دعني اشارك الهموم

بقصيدة تحمل هموم كل عربي

تعرض للظلم أيا كان نوع هذا الظلم

فأقول

عايش في دنيا من التعب
عايش ودوبني العذاب
أيامي بين برد ولهب
مقفول في وشي كل باب
ولو سألت عن السبب
ماسمعشي رد ولو عتاب
دي الخطوة عندي بتتحسب
واحسب لها الفين حساب
والكلمة عندي بالطلب
وانطقها إن عز الخطاب
يبقى ياناس ايه السبب
عايز ياناس منكم جواب
وسألت واحد وبأدب
كان رده أعجب م العجب
من غير ماذوق او كدب
قاللي أيامنا سراب
والكل خاسر ماكسب
والكل عايش في الضباب
والكدب عمله بتنطلب
والصدق مدفون في التراب
والعري أغلى من الدهب
حتى اسأل اولاد ال......
وان قلت تبقى ح تنضرب
ويسمعوك أوطى السباب
وان خوفت تبقى حتتغلب
ويقطعك ميت الف ناب
د الفقر متعبي ف قرب
والمال في ايد كل الذئاب
والناس بتغلي من الغضب
لو يبدءوا يهدوا الهضاب
وتقوللي ميت من التعب !
عايش مابين برد ولهب !
وجايني تسأل عن سبب !
ياسيدي حالك
أحلى من حال البشر
وتعالى شوف
قوم يالا دقق بالنظر
ح تشوف هنا
وتسمع هناك اسوأ خبر
ح تشوف بلاد
دلوقتي عاد مالهاش أثر
وتشوف غيطان
الزرع فيها بينطمر
وتشوف جبال
بيلين اساسها وينصهر
وتشوف وطن
عايشين ولاده في الخطر
وتشوف ولاد
شايلين سلاحهم م الحجر
وتشوف عيون
باكية تشوفها تقول مطر
بصيت لكل الناس لاقيت
هموم كتير مالهاش عدد
منهم المدفون في بيت
واللي ضاع منه الولد
واللي ماشي يقول ياريت
كنت أنا وتحيا البلد
كنت أنا وتحيا البلد
كنت أنا وتحيا البلد
شعر
حسني عبدالله جاد
عاشق الورد